Herriak Gasteizko kontzejuen esentzia noblea gordetzen du, Elorriagako Zaldun Kapareen Batzarraren Etxea izanda. Gasteizko herrixketako nobleek osatzen zuten erakunde hori, eta haien interesak Erdi Aroko Gasteizko hiribilduaren boterearen eta eraginaren aurrean babesten saiatzen ziren.
San Pedro elizako koruko horman sartutako egurrezko kutxa batean gordetzen dira Zaldun Kapareen Batzarraren liburu eta paper-sortak, baina Vitoria-Gasteizko Udal Artxiboan ere kontsulta daitezke, digitalizatuta baitaude.
Historiaz betetako Etxe hau Vitoria-Gasteizko 63 kontzejuen Batzarren egoitza da, antzinako zaldun kapareen tradizioari jarraiki.
Gaur egun izaera noble horren lekuko da Elorriaga Jauregia, aspaldidanik hotel bihurtutako XVI. eta XVII. mendeetako oinetxea, zeinen hormek adreiluzko eta haritz-egurrezko egitura geometrikoak dituzten. Independentzia gerran frantziarrek jauregi barroko hau kartzela bezala erabili zuten.
Elorriaga Gasteiztik independentea izan zen 1837tik 1870era arte, historia noble batekin, nahiz eta bertokoak «arriero» ezizenarekin ezagutzen ziren, askok mandoekin eta zamekin lan eginez irabazten baitzuten jornala.