Abetxuko hiriko auzoetatik grazia gehien duen horietarikoa da, bere etxetxo baxuak eta han-hemenka landatutako baratzeak direla-eta, baserri-kutsua ematen baitiote oraindik ere.
Zubiek osatzen dute Abetxukoren nortasuna eta gaur egun Gasteizek xurgatutako antzinako herri honen sarreratik ongietorria ematen dute. Abetxukoko Zubi Zaharra 1528an eraiki zen Zadorra ibaiaren gainetik igarotzea errazteko eta herrirako sarbide nagusi gisa erabili zen, baina XIX. mendean berreraiki behar izan zen, karlistadetan kalteak jasan ondoren. Dagoeneko ez du erabilera funtzionalik, baina iraganeko sinbolo gisa mantentzen da, eraistea ekidin zuten auzokideen presioari esker.
Gaur egun auzora sartzeko erabiltzen den zubia Oteiza eta Chillida gure eskultore handiei egindako omenaldia da. Duela 20 urte proiektatu zen eta bertatik igarotzen da tranbia.
